Pakaian pangulu diminangkabau

Saluak
badeta saluak palangai jantan, bayangan isi dalam kulik. panjang tak dapek di ukuo, leba taka dapek di bidai. salilik lingkaran kaniang, ikek satuangan jo kapalo. tiok katuak baundang-undang, tiok liku aka manjala, dalam karuik budi marangkak, tambuok dek paham tiok lipek.
lebanyo pandindiang korong dengan kampuang, panjang pandukuang anak kamanakan. hamparan di rumah gadang paraok gonjong nan ampek.

di halaman manjadi payuang panji kabasaran, tampek bataduah kahujanan, tampek balinduang kapanasan dek nan sapayuang sapatagak sarato dek nan salingkuang cupak adat, sapakat waris mandirikan sabuah kaum manjala masuak nagari

Baju Hitam
Babaju hitam gadang langan, langan tasenseang tak pambangi bukan karano dek pamberang. pangipeh angek nak nyo dingin, pa ampe miang di kampuang, pangiki nan bungkuak saruweh, kan pambuang sipaik nan buruak.
siba patanti timba baliak, mengilek mangalimantang, tatutuik jahitan pangibalangan. mambayangkan maule tak mangasan, mambuhuo tak mamiku.
batang awuo ba atok tungku
pangkanyo sarang limpasan
padi basasok jo bilalang
sariak nan indak paguno lai
mambuhuo kok mambuku
maule kok mangasan
budi kok tampak dek urang
hiduik nan tidak paguno lai
lawik ditampuo tak barombak, padang di tampuo tak barangin. budi jo halui lawik dalam, sipaiknyo bapantang ka ajuakan, mangampuangan pasie nan jadi pantangannyo.
larangan bimiliek kiri jo kanan, bamisiek makau kaamasan,gadang barapik jon ketek, tando rang gadang bapangiriang. tagak baapuang jo aturan, adat limbago nan mangapuangnyo. ba ukuo jambo jo jangkau unjuak baagak bahinggokan, murah jo maha di tampeknyo, martabat nan aman dipakaikan.
indak basaku kiri jo kanan, tando alamaik nan bak kian, indak pangguntiang dalam lipatan.
lihie lapeh tak bakatuok, babala sahinggo dado, manyatokan pangulu ba alam leba. lawik takkaruah karano ikan, gunuang tak runtuah karano kabuik, rang gadang martabatnyo saba pahik mani pandai maluluo cando kaiyo kasadonyo.
tangannyo bajulai-julai kanduonyo badantiang-dantiang, bahati lapang bapaham salasai, cukuik syarat kato jo rundiang Mansyaddah Qaumu fiduni walakhiraeh fauwa syaidun, kok iyo adat basandi sayarak, syarak basandi kitabullah, bak kato papatah :
simuncak mati tarambau
ka ladang mambawo ladiang
luko paho kaduonyo
adat jo syarat di Minangkabau
bak awua jo tabiang
sanda basanda kaduonyo

sarawa
basarawa hitam gadang kaki, kan panuruik alua nan lurui, kan panampuo jalan nan pasa, kadalam korong jo kampuang sarato koto jo nagari.
langkah salasai baukuran, martabat nan aman mambatasi. bajalan surang mintak daulu, bajalan baduo mintak ditangah, hemat cermatlah pangulu martabat nan aman bapantang lengah.
tanah kudarang dinan hitam, paham hakikat tahan tapo, manahan sudi jo siasek. kuma bapantang kalihatan, kokoh mangganggam nan sabinjek lah kajadi incek jambu monyek itu nan jadi pantangannyo

kain saruang
saruang sabidang diate lutuik, kayo jo miskin alamaiknyo, ado batampek kaduonyo, lurui dalam bulie sentiang, patuik sentiang tak bulieh dalam, karajo hati kasadonyo.
mungkin jo patuik ka ukuran, tanahnyo merah bacukolat. tando barani karano bana. ilemu bak bintang bataburan, sumarak di dalam koto, mancahayo masuak nagari.
dalam martabat nan tigo, kayo hati miskin hati, diate jalan kabanaran. namun nan bayiek nan dimintak. sabab tak larangan dek pangulu, alun bakandak ala baisi alun mamintak alah babari. apo sabab mangko baitu..?katupek bao balayea, bawo kasampan kalimonyo, takilek ikan di dalam ayie lah tantu jantang jo batinonyo.
tapi samantang pun baitu. kk ado tuntunan kanan buruak atau kanan tidak bayiek. baratui batu panaruang, tatagak paga nan kokoh. parik tabantang mahalangi, ba ampang kasubarang, badindiang sampai ka langik. haram kandang bapalakuan.
payokumbuaha baladang kunik
dibawo nak urang ka kuantan
bapantang kuniang dek kunik
tak namuo lama dek santan
bacawek salilik pinggang
bakain si bugilamo
badeta hitam bajalo
mahie di adat lancang di undang
tarang jalan ka sarugo
itu nan pangulu di Minangkabau

cawek pinggang
cawek sut bajumbai alai, saheto pucuak rabuangnyo jambu nan tangah tigo tampok. kapalilik anak kamanakan panjarek aka budinyo, kan pamawik pusako Datuok nan kokoh lua jo dalam. nan jinak nak samakin tanang, nan lia ja an tabang jawuoh, kabek sabalik babuhuo sintak, kokoh tak dapek di ungkai, guyangnyo bapantang tangga, lungga bak dukuo dilihie, bak pepatah :
masaklah padi rang singkarak
masaknyo batangkai-tangkai
satangkai jarang ado nan mudo
kabek sabalik babuhuo sintak
jaranglah urang nan maungkai
kok tibo maso rarak sandirinyo

Sandang
di bahu manyandang kain kaciak, kain cindai ampek sagi, kan pahapui paluah di kaniang, pambungki nan tingga bajapuik, kan pangampuangkan nan tacicie di jalan.
kato daulu batapati, kato kudian kato bacari, tak bulieh tidak jangyo adat. tandonyo tuhan basifat Qadim. di rantai kunci tagantuang, babagai bantuak ragamnyo, marupokan alat jo pakake, banyak nan salapan bele buah.
kalau ditinjau alamat kunci. kok tibo dimaso kayo kan pambukak peti kabaragie. kok tibo dimaso misikin kan pangunci puro basiceke. kalau dimaso murah, kan pambuka peti pakaian untuak manuruik aluo nan lurui kan panampuo jalan nan pasa.
namun lah tibo dimaso maha, nak kokok simpanan dek kuncinyo kalau diadat nan bapakai di tiang simajo lelo. kalau pusako kabajuntai, kan pambuka peti bunian bayiek digantang nan tatagak. sasudah gantang di bala kan penyingkokan simpanan adat.
panyimpan kato kahulatan, nak kokoh hari jo balabeh. sasuai mangko manjadi, saukuo mangko takanak, kok pandai bamain budi rang lain jadi dunsanak

sanjato kari

pepatah pamenan andai
gurindam pamenan kato
mamacik ulu kok tak pandai
hancua nagari kampuang binaso

elok nagari dek pangulu
rancak tapian dek nan mudo
kok tak pandai mamacik ulu
puntiang tangga sansaro mato

falsafah pakaian pangulu
di dalam luak tanah minang
jikok ambalau marantak ulu
puntiang tangga mato tabuang

sanjato kari kabasaran, sampieng jo caweknyo. sisiknyo tanaman tabu, lataknyo condong ka kida, dikesong mangko dicabuik. gembonyo tumpuan puntiang, tunangan ulu kayu kamaik. kokoh tak tarago de ba ambalau, guyahnyo bapantang tangga.
bengkok nan tangah tigo patah atau nan tangah tujuah patah, tapi luruik manahan, titiek, bantuak dimakan siku-siku,  lurui di lapeh banang. kok bungka manahan asa. hukum adie manahan bandiang nan bana manahan liek.
bamato baliak batimba, sanyawo pulo gembongyo, tajam nan bukan mangupalang, bapantang balampe ka asahan. tajam tak rago dek bagabui, mamutui rambuik diambukan. tapi tajam pantang malukoi, kan parawik parik ulu, kan pangiki miang di kampuang, kan panarah nan bungkuak saruwe.
ipuonyo turun dari langik. bisonyo bapantang katawaran, jajak ditikan mati juo. kan palawan dayo rang halui, kan panulak musuah di badan. jalan nan buruak jaan tatampuo bagai pepatah gurindam adat :
kari sampono ganjo hera
bingkisan rajo mojopahik
patah lidah bake kalah
patah kari bake mati

nan rajo tagak di bari
pangulu tagak di undang
bukan murah basisik kari
kapalang tangguang pusako lindang

Tungkek
pamenan tungkek kayu kamaik, ujuang tanduak kapal perak. kapanungkek adat jo pusako. bari tatagak nak jaan condong, soko nan tatap jo inggiran.
ingek samantaro balun kanan. gantang tatagak jo lanjuangnyo. sumpik tatagak jo isinyo, adat tatagak jo limbago.